Кейкі қашып келеді –
Жолбарыстай.
Жолбарыстай жүрегі – ар-намыстай.
Томағасын сыпырып,
Тоят таппас –
Көкті шарлап бір қыран қолдан ұшпай.
Кейкі қашып келеді –
Киіктейін.
Көкірегінде көп шер бар – күйіктейін.
Өлермендей,
Кеудесін өрге салып,
Дегендейін – ұшайын, биіктейін.
Кейкі қашып келеді –
Қайда қашып?!.
Қайда қашып – бір қырғын майдан асып.
Қолтығынан дүлей күш бір көтеріп,
Алқымынан асау жел аймаласып.
Кейкі қашып келеді –
Қашпасына,
Қашпасына бір сырды ашпасына
Қояр емес,
Қу жанын қуырдақ қып,
«Өңкей қиқым, би болған бас-басына!»
Кейкі қашып келеді –
Қашып келіп,
Өлтірмесе құдайы нәсіп беріп.
Ұлар құстай тығылды Ұлытауға –
Өзен-көлді, тау-тасты асып келіп!
***
Ұлытау – ұлылықтың ұясындай,
Үшкір шың – қыран ұшар қиясындай.
СЕРІК ТҰРҒЫНБЕКҰЛЫ