Айтшы маған, серті берік серігім,
жұрт ішінде жақтырмай жүр мені кім?
Бірі дарға ассам дей ме тап қазір,
бассам дей ме көңілімнің желігін!
Қиянатты кешпедім бе, кештім бе,
келем әлі кекіреймес кескінде,
мені жақсы көрмеу деген не сұмдық,
жамандығым жоқ еді ғой ешкімге!
Залалым да тимеген бір пендеге,
жік-жапар боп жатпайды енді ел неге?
Үлкен-кіші ұнатпастай,
шынымен
Құдай сүйер қылық жоқ па менде де?!
Қой, ағайын,
мені жақсы көріңдер,
төрге өтейін, тік түрегеп орын бер.
Жегжат біткен жапырылып қоғадай,
тәжім етіп тұрсын бүгін келіңдер!
Оқта-текте бір көретін төбемді ел
болмай-ақ та қояйыншы кемеңгер.
«Құрақ ұша қоятындай алдында,
қай қылығы өте кетті?» демеңдер.
Өзімдей-ақ болар елге сенімді ер,
сол үшін де көңіліңнің төрін бер.
Неге екенін сұрамай-ақ, ағайын,
барлығың да мені жақсы көріңдер!
Талай қызық тамашаң бар, тойың бар,
бір мықтыңа балап мені мойындар,
сәл кешіксем – есік жаққа елеңдеп,
қастарыңнан орын сайлап қойыңдар.
Алдымызда талай қызық тоқ таң бар,
мен емеспін көре тұра көпті алдар,
жақын жүрсем – қатарыңнан қалдырмай,
алыс кетсем – аңсап іздеп жоқтаңдар!
Жасандылық болған емес күлкімде,
жоламадым жағымпаздық шіркінге,
ел қалаған өркеуденің өзімін,
мені жақсы көрмеулерің мүмкін бе?
Сәкен Иманасов