Алғаның белгілі ғой кімнен үлгі,
теріп те қайтем сенің міндеріңді,
Сезем тек,
көптен бері бұғып қана,
ішіңнен тынып қана жүргеніңді.
Құлқыңды,
қылығыңды өткендегі
ұмытып кете қойды деп пе ең мені,
татулық болмасына жеткен көзім,
жолымыз арадағы шектелгелі.
Алалап,
арыма да тиетін ең,
алданып келгеніме жиі өкінем.
Күтіп те жүрмін бүгін,
көрінер деп,
қашан бір баяғы тар ниетімен.
Қалпында
риясыз күлкіме де өш,
тағы да шығарсың-ау жыртып өңеш.
Бәрібір ұры ниет пиғылыңды,
Жасырып қалуың да мүмкін емес.
Жүргем жоқ баяғыдай мен де қалғып,
қашан бір қағынар деп,
келген андып.
Жүзіңді айдай етіп осындайда,
кім едің –
көрсетейін елге барлық..
Сәкен Иманасов