Көрмей-ақ
Кейде шағар мұңымды ерсі,
Халімді жиі сұрап жүріңдерші.
Суытпай іздеріңді.
Әдейі іздеп
Күніне құрығанда бірің келші!
Тарылып бара ма деп бұрынғы өріс,
Жүрегім болып алды дірілдегіш,
Бетке алып біздің үйді
Баяғыдай
Тобыңмен тағы да бір дүрілдеп ұш!
Жұп жазбай жетіңдерші дүрілдесіп,
Қонғандай болсын үйім бүгін көшіп,
Шеті де түрілмесін дастарханның,
Жабылмай жатсын ашық бұрынғы есік.
Болмайтын баяғыдан бірің қарсы,
Арнаған өздеріңе жырымды алшы.
Халімді жиі сұрап,
Жақсыларым,
Жоқтатпай
Жиі келіп тұрыңдаршы.
Сәкен Иманасов