Алакөлім –
Асыл анам, байтағым,
Жеттім бүгін жұмыртқадай шайқап үн,
Көңілім бар толқып барып басылған,
Саған оның қайсы бірін айтамын.
Алдиярым,
айналайын, айдыным,
Алдыңа кеп ақ жүрегін жайды ұлың,
Мұңым қанша мұнарыңа ұқсаған,
Саған айтып шағынайын қай бірін!
Оза шығып арасынан көп ұлдың,
Боранындай бұрқамақ ем Ебіңнің
Қабағыңа қарап тағы қиналдым,
Қасиетті қара орманым, не білдің?!
Мезгіліңе бере қойған жоқпыз өң,
Үмітіңді неге сенің текке үзем!
Сыбызғылы үн сияқтана сыңсыған
Сырларымды қалай бірақ жеткізем?!
Басқаларға айтуға да батпаған,
Көкіректе келдім қанша сақтап ән!
Тоғыз валды толқынындай
Тірліктің
Қай қылығын, қай бір үнін ақтарам!
Алакөлім,
айналайын, жыр бесік,
Желдеп ықсын төбемізден мұң көшіп,
Баяғыдай үнсіз ғана ұғысып,
Тілсіз ғана тұрайық та тілдесіп.
Сәкен Иманасов