Айтамын деп байлығың, барлығыңды,
Бал-бұл жанып бет-бейнең сан құбылды.
Апыр-ау, бұл немене,
Ақшаменен
Өлшенетін болған ба ар бүгінгі?
Жарлымын деп айтпассың сен бұл күнде,
Арлымын деп айнала сендірдің бе?
Жабыққанда кімдерге жәрдемдесіп,
Тарыққанда қол ұшын бердің кімге?
Бүгінгіге бұлтақсыз жеткеніндей,
Жүр ғой талай жақсылар жоққа емінбей,
Аңқылдап-ақ жүрген бір ағайын бар,
«Жарлымын ба, жоқпын ба?» – деп те білмей
Тыраштанып сендердей, тірнектеуге,
Жібермесе қайтсін-ау бірбет кеуде,
Кетіп жатса бар тапқан-таянғаны
Ақ періште жүрегін кірлетпеуге…
Сәкен Иманасов