Айналғандай тасқынға
Біртіндеп бүкіл жер жүзі.
Жатқандай аспан астында
Жалғыз-ақ Каспий теңізі.
Жөңкіліп толқын тоқтайды,
Жартасқа соғып тебіндеп.
Тағы да тағат таппайды,
Сақылдап жалын жел үрлеп.
Жалпақ жон асау жайындай
Толқындар тулап ойнаған.
Балықшы одан тайынбай,
Қайығын қарсы айдаған.
Сұрапыл кезең өткендей,
Қалғандай қатер артында.
Енді ол көкке жеткендей,
Толқыннан мініп толқынға.
Сырбай Мәуленов