Қызыл іңір арасында,
Көрдім сені қас-қағым,
Арманды іздеп барасың ба,
Аппақ айдай асқағым?
Бөгет болып келем бе мен,
Кешкі сыңар серігім?
Сертің бар ма келем деген,
Елеңдеген елігім?
Бой балқыта бір ырғақты,
Барады ойнап бар тұлғаң,
Күн нұры да күлім қақты
Құшып-сүйіп балтырдан.
Барады ойнап балғын денең,
Тап мұндайды кім көрген!
Тағы да естен тандым, дер ем
Тіл шіркінді-ай, күрмелген?
Жетем дейтін шыңға талмай,
Жүрек серті бекер ме,
Шынымен-ақ бір бата алмай,
Тіл қата алмай кетем бе?
Әлде ішіңнен күліп анық
Күттің бе ерлік менен сен?
Қайтер едің,
іліп алып,
Құйындата
Жөнелсем?
Сен де
мендей жалғыз ба едің,
Шын жақсыға ынтызар?
Сері көңіл сал қыз ба едің,
Күйкі өмірден күрт ұзар?
Көктей өтіп, өлкені кең,
Кетсем бе екен енді үдеп?
Талай-талай өртеніп ем,
Өртенсем бе соңғы рет…
Сәкен Иманасов