Аласұрған ашқарақ көңілім-ай,
Қомағай ғып қойыпты-ау сені құдай!
Отты іздейсің,
Қайдағы жоқты іздейсің…
Көкті іздейсің көкірек керіп ұдай!
Тірлік барда ұнаған,
Ұнамаған
Тыным бере қоймассың, сірә, маған.
Жосылып-ақ кеткің де келетіні-ай,
Қосылып ап қиқуға бір аламан!
Бұйырғандай барлығын маған ғана,
Жетелейсің жақсыға,
жаманға да,
Тасыдың да қаншама,
Жасыдың да…
Сайқал әуен сазына сан алдана.
Ағыл-тегіл айнала сыр ақтара,
Сүйрелейсің тозаққа, жұмаққа да.
Екілене еліріп,
Екпіндеп кеп,
Оңашада жатқаның жылап қана!
Ұрынбасқа ұрынып,
Текке еміге,
Күйдірмедің кімдердің от деміне,
Алып-ұшып,
Қаншама жаңылысып,
Қараттың ба жан азап шеккеніне!..
Сәкен Иманасов