Апыр-ай шіркін,
Артқыларға айтып жүрерлік.
Кеткенім бе осы,
Көре алмай сенен бір ерлік?
Пасықтығыңа кешіре қарап,
Күлдік те,
Жасықтығыңа – қайысып,
Түгел түнердік.
Ашынып іштей,
Санайды деме бекер кек.
Кім білсін,
Біз де саған-ақ ұқсап өтер ме ек.
Ақ жүрек достан қарадай қорқып,
Қашқақтап,
Қашып та жүрсек,
Қырсығы тиіп кетер деп.
Тірлікті қанағат тұтпасақ
Шұғыла күнсіз,
Жақсылар үшін
Дауға да кіріп бір ессіз,
Жағаласып та өтпесек есер тағдырмен,
Жеңілмейін деп те,
Берілмеймін деп те күрессіз.
Күштіге қарсы бармасақ,
Көзсіз батырдай,
Өртеніп іштей жанбасақ,
Күйіп,
Шатырлай
Саған-ақ ұқсап өтер де ек тыныш,
Жүре алсақ,
Бойымызда бардан басқаға түйір татырмай.
Жан болып сен де,
Жасадың ба екен еш күнә!
Тентектік көрсең,
Шошына тұрдың осқыра.
Біз болсақ, шіркін, жібітем деп те әлекпіз
Мұзды мұхиттай сіресіп тұрған досты да.
Қашанғы солай,
Тартынбас жерде тартынып,
Ойыңды бөгеп өтер екенсің бар тұнық?
Артықтау кетсек,
Күлесің бізге,
Жүрсек те,
Ұқсастығыңды жасырамыз деп,
Шарқ ұрып.
Сәкен Иманасов