Қызыл іңір арасында,
Не түнде,
Есіңе алып өксіме де өкінбе.
«О, шіркін де ет-жүрегі езіліп,
Осы қазір қай жетісіп отыр!» – де.
Жылама да
Жүрегіңмен келіспей.
Кінәлама қылығымды теріс кей,
Күрсін де қой «Төсегінде дөңбекшіп,
Аласұрып жатқан шығар», – деп іштей.
Қызыл іңір, арасында,
Не түнде,
Мені есіңе алып бекер өкінбе,
«О, шіркін де жан-жағына жалтақтап,
Жаны езіліп, жалғызсырап отыр!» – де.
Сәкен Иманасов