Құдай қалай өң берген!
Азап саған аз қарау!
Жігіт біткен
Көргеннен
Күйіп кете жаздады-ау!
Оқып жатты бірі өлең,
Ақтарылды жай талай,
Бірі – ақшасын «күреген»,
Айтып қалды «байқамай».
Біреуі айтты шет елге,
Осы биыл барғанын,
Енді бірі «бекерге»
«Волга» сатып алғанын.
Айтылмаған сырлар да,
Естілмеген күлкің де,
Қасында сен тұрғанда,
Ақтарылмау мүмкін бе?!
Бәрін де тең көргендей,
Ешкімге артық өң бермей,
Сылқ-сылқ күліп сен тұрдың,
Сымбатыңа сенгендей…
Бір тіл қатпай қалдым да,
Биіктеді-ау шоқтығым,
…Білгем,
Сенің алдында,
Түйір құным жоқтығын!
Сәкен Иманасов