Туған жер,
тыным жоқ менде,
Қалғанша қуат сарқылып.
Құс болып келіп көктемде,
Көлінде жүзем шарқ ұрып.
Даланды жазда жаңғыртып,
Сусап та жатқан шақтарда.
Кеудемнің бұрқақ бар бұлтын,
Төгіп бір өтем бақтарға.
Жүрсің-ау баурап, мені ұстап,
Жанымды сұлу орап ән.
Күз болып кетсем келісті-ақ,
Қыс болып әппақ оралам.
Жетермін және сен күткен
Дауылды көмей жыршың боп.
Өзіңе ғана ел біткен
Таңырқай қарап тұрсын деп.
Сәкен Иманасов