Бүлінеміз несіне, жүгіреміз не жетпей?
Уақыттың жоқтығын қоя тұршы сөз етпей.
Кейде бізге жыл деген әне-міне дегенше-ақ,
Кейде жалғыз түнің де тұрып алар тез өтпей.
Біреулерге бар ғұмыр болмай да қап бір күндей,
Біреу үшін бұл өмір таусылмайтын сүргіндей.
Тағы бірі уақыт жетпейді деп жыласа,
Тағы бірі қай жаққа жіберерін жүр білмей.
Уақыттың қадірін білеміз бе?
Білмесек –
Жетпейді деп, бұ құрғыр бүлінгенің кімге сеп,
Жетеді ғой уақыт, жетеді ғой, достым-ай,
Ысырапсыз тек соны жұмсай алмай жүрмесек!..
Сәкен Иманасов