Жалғыз ішу асыңды жанға ауыр ма,
отырғанда елестер қармауында?
Өткен күннің бір мұңы бар жүректе,
өткен күннің бір дерті бар бауырда.
Серіктерім: кітаптар, сезім, өлең,
теледидар, темекі, өзім, әлем,
Үйренісіп алғанмен осыларға,
үйренісе алмадым өзіме мен!
Түн – түйсіну, сезіну, күн – ой салу,
болмады оңай өзіме ұнай салу.
Жиылмаған төсекке кешкісін кеп,
қиын маған киімшең кұлай салу!
Бейімделгіш келгенмен пенде деген,
Түз аңындай сыясың бөлмеге әрең.
Маңдайдағы жазудың сиялары
таңдайыма тамады – кермек өлең…
ЕРЛАН ЖҮСІП