Жаулардың қолы қынулы,
Жұмырығы жұмулы –
Жағаға әлі жармасқан.
Тұлпар жоқ тегі өзіңдей,
Төрт аяғын тең басқан.
Патша да,
Хан да
Жоқ әлі–
Арыны күшті арбасқан.
Шіренеді шенеунік,
Кіреуке –
Көзін шел басқан.
Бұл күнде түйір пайда жоқ
Ағайын,
Достан,
Жолдастан.
Соларға куә қашаннан –
Орманым мынау шуласқан,
Тауларым анау қар басқан.
Тағы бір батыр туар ма,
Елім үшін егескен,
Халқым үшін қандасқан?!
Құбыладан соққан
Көк дауыл,
Көгілдір Туды желпиді,
Көңілім таза –
Таңғы аспан!
СЕРІК ТҰРҒЫНБЕКҰЛЫ