Жүректі тербеп тәтті арман,
Жанымды жасыл нұрға ашам.
Бұрқырап тұрған бақтардан.
Бұлбұлдың үнін тыңдасам;
Толқып бір барып басылған,
Өзіме өзім күлем де,
Айналып алтын ғасырдан,
Алғысымды айтам ұлы Елге,
Жапсардан қарап жаһұт күн,
Жаңа бір таңым атқанда,
Басыма қонған бақыттың.
Бағасын ойлап жатқанда.
Осының бәрі – отты үнмен
Өшірген өңез дау үнін,
Өзіңнің арқаң деп білем,
Дәуренді менің Дәуірім!
Көңілің кейде көк тіреп,
Күй-кеудең күмбір қаққанда,
Баянды бір күн өтті деп,
Балбырап жатқан шақтарда,
Құмарың қанбай кездің бе,
Дірілсіз тұнық жан көлін, –
Арайлы мынау Мезгілге,
Алғыс боп шығар әр демің!
Сәкен Иманасов