АРҒЫМАҚ — қазақ жылқысының сұлу, асыл тұқымы. Қазақ жерінің табиғатына үйлескен А. төзімділігі, алысқа шабуы, күй талғамайтындығы жағынан түркімен жылқысынан асып түскен. 19 ғ- дың аяғында орыстың жылқы мамандары 3 ахалтеке мен 3 қазақ А-н жарыстырып сынаған. Жарыс кезінде ахалтекелер бірден озып шыққанмен, ұзай келе А-тан қалып қойған. 18 ғ-дың ортасында Абылай хан Алатау қырғыздарының әрбір түтініне бір-бір арғымақ бағып беруге салық салған. Мұны “ханның қазынасы” деп атаған. А. қазір кездеспейді, бірақ халық арасында жүйріктік пен төзімділік баламасы болып қалған.