АЛҚА ТҰҚЫМДАСЫ (Solanaeae) — бір және көп жылдық шөптесін өсімдіктер. Бұта түрінде кездеседі. А. т. 11 туыс, 23 түрге бөлінеді. Бүтін жиекті немесе тілімденген жапырағы тік не жатаған сабағына кезек орналасады. Гүлі қос жынысты. Гүл шоғыры бұйра болады. 5 тостағанша жапырағы бірігіп, жоғ. жағы тілімденген. 5 күлте жапырағы бірігіп, қысқа түтік түзеді. Аталығы 5, аналығы біреу. Жемісі — көп тұқымды жидек немесе қауашақ. А. т. — негізінен аса бағалы тағамдық (баклажан, қызыл бұрыш, помидор, картоп, т.б.), сәндік және тех. (темекі) өсімдіктер болып саналады. Олардың құрамында бірнеше улы алкалоидтар болады, сондықтан оларды мал жемейді. Жабайы түрлерінен дәрі алынады.