АҚШЫЛ СЕПКІЛГҮЛ (Fritillaria pallidiflora) — лалагүлділер тұқымдасының сепкілгүл туысына жататын көп жылдық жуашықты өсімдік. Қазақстанда Тарбағатай мен Жоңғар Алатауындағы субальпілік шалғындар мен жартастарда өседі. Биікт. 40 см-дей, жуашығы ұсақ, домалақ болады. Бұтақсыз сабағына жапырақтары кезектесіп немесе қарама-қарсы орналасады. Төменгі жапырақтары ланцет тәрізді, ал жоғарғы жапырақтары шоғырланып келеді. Ірі гүлі қоңырау тәрізді, дара немесе 2-5 гүлі бар иілген шашақ гүл шоғырына бірігеді. Гүл күлтесі сарғыш не ақшыл жасыл, ал оньщ ішкі жағында қоңыр қызыл түсті дақтары бар. Осыған байланысты ол А. с. деп аталған. А. с-дің жағымсыз иісі болады. Тұкымынан көбейеді. Мамыр — маусым айларында гүлдеп, шілдеде жеміс береді. Жемісі — көп тұқымды қауашақ А. с. — сирек кездесетін өсімдік. Жылдан-жылға таралу аймағының тарылуына байланысты қорғауға алынып, Қазақстанның “Қызыл кітабына” енгізілген.