АҚШАТАУ — Сарыарқаның оңт.-шығысындағы жота. Шығыс Қазақстан обл-ндағы Абай, Аягөз ауд-ндары жерінде, Шыңғыстау жотасының оңтүстігінде орналасқан. Солт.-батыстан оңт.-шығысқа карай жалғаса созылып жатқан Қарақшы (биікт. 1151 м), Жалтұмсық (биікт. 1169 м), Қособа (биікт. 1304 м) сияқты бірнеше жеке таулар мен шоқылар тізбегінен тұрады. А- дың ең биік жері — Құдияр тауы (биікт. 1000 м). Оларды Арсалаң, Ақшатау өз-дерінің аңғарлары бөліп жатыр. Жотаның оңт.-батыс беткейі тіктеу, жартасты, биікт. 1300 м-ден 1000 м-ге дейін күрт төмендейді. Солт.-шығыс беткейі еңістеу, бірте-бірте көлбеуленіп жазыққа айналады. А. палеозойдың кварйит, құмтас, әктас, конгломерат, эффузиялық жыныстарынан құралған. Оңтүстігінен Балқыбек, Көксала, Қалғұтты, шығысынан Сарыбұлақ, солтүстігінен Шетембай, Терісайрық өз-дері бастау алады. Жотаның жалпақ төбелері мен беткейлерінің қоңыр топырағында далалық өсімдіктер, қараған, тобылғы, тасжарған, т.б. бұталар, сайларында шоқ қайың, көктерек, тал өседі. Мал жайылымына қолайлы.