АЙТБАЙ Төлеұлы (шамамен 1720 — 90) — қазақ батыры, мемлекет қайраткері. Үйсін Төле бидің баласы. А. әкесі Төле бидің ел басқару ісінде басты көмекшілерінің бірі болған. 1739 — 40 ж. Ташкент уәлаятына Ресей және Қытай елшілері келгенде хан атағы Жолбарыста болғанымен қаланы Төле би билейтін. Ташкент қала-мемл. саналатын. Ташкент уәлаяты әскерлерінің аға батыры болған. 1740 — 50 жылдардағы қазақ-жоңғар, қазақ-қоқан, қазақ-бұхар, қазақ-хиуа қақтығыстарының бел ортасында жүрді. Ресей патшалығының, Боғда хандығының басқыншылық әрекеттеріне қарсы күресті, елшілік жұмыстармен айналысты.