АЙТАЛИЕВ Шмидт Мұсаұлы (28.1.1935 ж.т., Орал) — ғалым, тех. ғыл. докт. (1974), проф. (1980), Қазақстан ҒА- ның акад. (1994). ҚР ғылымы мен техникасына еңбек сің. қайраткер (1995). Қаз-МУ-ды бітірген (1957). 1957 — 60 ж. Орал пед. ин-тының ассистенті. 1960 — 76 ж. және 1987 — 91 ж. Қазақстан ҒА Матем. және мех. ин-тының, 1976 — 86 ж. Сейсмология ин- тының, Мех. және машинатану ин-тының кіші және аға ғыл. қызметкері, лаборатория меңгерушісі болды. 1992 — 97 ж. Атырау қ-ндағы ҚР ҒА Батыс бөлімшесінің акад.- хатшысы қызметін атқарды. 1997 жылдан ҚР ҒМ — ҒА- ның физ.-матем. бөлімшесінің төрағасы. Негізгі ғыл. еңбектері тау жыныстары механикасына арналған. Біртекті және әртекті анизотроптық серпімді-пластикалы тұтқыр массивтегі жер асты құрылыстарының статикалық және динамикалық кернеу күйін, деформациялануын, қозғалуын, беріктілігі мен орнықтылығын зерттеген. Жер асты бекітпелерінің жаңа құралымдарын есептеу әдістерін жасады. 9 — 10 баллдық жер сілкінісі кезіндегі болашақ Алматы метросының сейсмикалық орнықтылығын анықтады. Сондай-ақ терең мұнайгаз оқпанын бұрғылау динамикасының, көліктік құрылыс механикасының кейбір өзекті мәселелерін де зерттеді. А,— республикадағы жер асты құрылыстары механикасының ғыл. мектебін құрушылардың бірі.