Ақтөбедегі Жалаңтөс Баһадүр Сейітқұлұлының ескерткішінің ашылуы құрметіне арнадым!
Уа, Жалаңтөс – Жанбабам! Жанбабамсың – ерлеген!
Өжет рухым – өзіңсің – өлмеген де сөнбеген!
Тірі болу дегенім – тірі болу есімің,
Қаларыңа сен тірі қасдұшпаның сенбеген!
Мəңгі болу үшін де, Сен, өмірге келіпсің.
Елің үшін егесіп, сан күресте жеңіпсің.
Ақсақ Темір ұстазы – Ораз қажы – ол бабаң,
Таза жүрек түбінен текті шуақ төгіпсің.
Атың сенің бүгінде Алашыма аманат,
Ардақтайды бар қазақ əзтұлғаңды даралап.
Ораз қажы ұланы Тоқпан жайлы толғансам,
Ождан-Рухым оянар тылсым күйде ғаламат!
Атағанда аттарын: тектілердің әскерін,
Кернеп кетер көзімді жарқыраған жас керім.
Көз жасым бар киелі, ұлты қазақ жасымның,
Уа, Жалаңтөс – Жанбабам! Қасиеттім! Қастерім!
Жазып алып жүрекке жұлдыздардың күбірін,
Жазып алып жүрекке Ұлы Дала сыбырын.
Уа, Жанбаба, жырлайын, ұрпағыңа қуат бер,
Ғибратты мен үшін ғұламалық ғұмырың.
Тоқпан батыр ұрпағы, асыл əкең – Сейітқұл,
Сейітқұлдың жұлдызы бүгін, міне, биік тұр.
Əулие болған əзбаба əмбе жұртқа əйгілі,
Жұлдыз болып аспандап күш-қуатын құйып тұр.
Тəуелсіздік күн туып – ақтарылды азат сөз,
Ғазилыққа жетті де ғұлама сөз, ғажап сөз.
Əйтеке би бабасы – бір өзіңсің, Баһадүр,
Жүрегімде жаңғырды бабам айтқан қазақ сөз.
Ақтөбемде қос белгі жас бергендей зағипқа.
Ескерткіші тұр əне – Əйтеке би салих та!
Екеуің де қазаққа қамқор бола білдіңдер,
Есімдерің қадірлі екеуіңнің тарихта!
Уа, Жанбаба, армысың, баһадүрім бұқари,
Әр сөзіңнен аңқыған тектілік-нұр жұпари.
Құтты болсын тасбелгің, құтты болсын жеңісің,
Құтты болсын, құрметтім, Жаңғырғаның Рухани!
Уа, Жанбабам, жұпарым, тасты жарған гүл сынды,
Гүлге қарап елжіреп, жүрегіме нұр сіңді.
Тастың өзін жібіткен, жастың өзін нұр еткен,
Көріп тұрмын биіктен кие тұнған тылсымды!
Сырым осы, Жанбаба, ақтарылдым, ашылдым,
Ұрпағымын жəне мен бір өзіңдей асылдың.
Көз жасымды көрсеңіз – қуаныштан себебі,
Ұлы Далам, қарашы! ҰЛТЫ ҚАЗАҚ ЖАСЫМНЫҢ!!!
Ұлы Далам, қарашы! ҰЛТЫ ҚАЗАҚ ЖАСЫМНЫҢ!!!
Құрметпен, Балтабек Нұрғалиев