Не істеу керек? Не істеу керек?
Кешу керек, кешпеу керек?
Бару керек, бармау керек,
Қалу керек, қалмау керек?
Сену керек, сенбеу керек,
Көну керек, көнбеу керек?
Кімді алдадым, кім алдады?
Ұға алмады, ұға алмадым!
Арғы жағын сахнаның,
Мекен етіп отырамын,
Сағынамын, аһ ұрамын,
Өкінемін, опынамын,
Бару – ауыр, қайту – азап,
Сүймеймін деп айту – азап!
Сахнаның сұрағаны –
Ақын емес, сайқымазақ!
Өртең жүрек, өлермен зар,
О, бұл зарды неге кештім?!
…Залда – жалғыз көрермен бар,
Оның өзі – сен емессің!
ЕРЛАН ЖҮНІС