Сұқ көздер жұмулы тұрғанда,
Сұқ саусақ бүгулі тұрғанда,
Сырласып алыңдар, сүйгендер!
Сұқ тілдер күрмеліп тұрғанда,
Сүйген жан гүл беріп тұрғанда,
Сырласып алыңдар, сүйгендер!
Шынжырлар маужырап жатқанда,
Мылтықтар ұйқыға батқанда,
Сырласып алыңдар, сүйгендер!
Сынақтар сағаты соққанша,
Әлдекім есікті қаққанша,
Сырласып алыңдар, сүйгендер!
Жақының жат болып кеткенше,
Жаныңнан жоқ болып кеткенше,
Сырласып алыңдар, сүйгендер!
ЕРЛАН ЖҮНІС