Қом тиеп, Ата тарих арқалаған,
Шом артып, кең далаға аңсары ауған.
Ежелден еркін елдің ұрпағымыз,
Асау мініп, қолына арқан алған.
Күңірентіп, қобыз тартып, созған әнін,
Көлімнен аққу ұшпай, қаз қамалдың.
Арыстарым апайтөс оққа ұшқанда,
Көргенбіз, Аруана елдің боздағанын.
… Бөлтірік, абадан болған жотасынан,
Дүлдүлдің шаң жұға ма шашасынан.
Бесік жыры сәбиін құндақтаумен,
Аруана айырылмасын ботасынан.
Еркін ел, шаттығың бар, мұң басылды-ай,
Өшкенім қайта жанды, күн жасырмай.
Діл мен дін, тарихымыз қайта оралды,
Ақ шашты Аруана жұрттың сырласындай!
Ербол Бейілхан