Таулармен таулар сүйісіп,
Жақындай түсіп күннен күн,
Қалғандай бір кез түйісіп,
Тұмсығы алып пілдердің.
Толқындар тауды сүзеді,
Майданға түскен батырдай.
Қарғиды Шудың өзені,
Манастың ұшқыр атындай.
Қырғыздың жерін кезеді,
Толқындар ойнап алысып.
Қалмайды Шудың өзені
Сенімен бірге жарысып.
Ағады Шудың өзені
Айнала тауға дес бермей.
Толқынынан ежелгі
Қырғыздың күйі ескендей.
Сырбай Мәуленов