Жүрсің бе сен әлі де,
Ұмыта алмай өкпені,
Кезіккеннің бәріне
Кінәлі етіп тек мені?
Кеудеңдегі кек үдеп,
Сөз таба алмай салар дақ,
«Бір оңбаған еді!» – деп,
Жүрсің бе әлде жамандап?
Тұла бойы езіле,
Түнде жаман түс көріп,
Ыза болып өзіңе,
Оңашада тістеніп,
Еске салып мұң кейде,
Ессіз сезім бекерін,
Жүрсің бе әлде
Білмей де
Кінәлі кім екенін?
Болаттай-ақ бекініп,
Болған іске бұл ағат,
Өзің ғана өкініп,
Өзіңді-өзің кінәлап,
Күрсін, мейлі,
Күрсінбе,
Кешіре алмай,
Кім ұтты?
Өшіре алмай жүрсің бе,
Кеудеңдегі күдікті?
Сәкен Иманасов