Көктембісің, күнім-ау, көктембісің?
Көктембісің? Күлімдеп жеткенбісің!
Қона-қона қалыңдар қойныма кеп,
Дүр-дүр ұшып дірілдеп кеткен құсым!
Суырыла сыланып ұшқан ұдай,
Саумысыңдар, сауықшыл құстарым-ай!
Құстарым-ай, сендерді бұрын-соңды
Сағынбаппын дәл осы қыстағыдай!
Жетімсіреп сендерсіз жерім менің,
Аңсатты ғой арманшыл әр үндерің,
Өз қолымнан аялап ұшырайын,
Ұсынайын, келіңдер, көңіл көлін.
Келіңдерші, құстарым!
Кел!
Келіңдер!
Тербеліңдер, далама өң беріңдер.
Іздеген ем сендерді аласұра,
Үзбеген ем көктемнен мен де күдер.
Дабылыңмен баяғы өршіл өктем,
Келіңдерші, құстарым!
Келші, көктем!
Айналғым кеп барады жаратқаннан,
Осыншалық сендерді жершіл еткен.
Сәкен Иманасов