Жақыным кім?
Жатым кім?
Алысым кім?
Ұмытпаппын ешбірін танысымның.
Мінезіммен,
Мініммен,
Мен де олардың
Шықпасам деп есінен жан ұшырдым.
Жолығайын…
Шығарып салайын көп,
Жан ұшырдым есінде қалайын деп,
Бір кездескен адамға
Аңқақ қақтым,
Араластым кетуге ағайын боп.
Көңілімді тұрса да күдік бөгеп,
Қолын алдым біреудің күліп те кеп…
Мінін көрсем,
Бұлтартпай бетіне айттым,
Сөзге тоқтар, серт ұстар жігіт пе деп.
Ақ жарылдым, –
Ағайын соны ұқпады,
Қатты кеттім – қайтадан жолықпады,
Ұмытпаппын оны да,
Көп таныстың
Қала берді біреуі болып тағы.
Жан ұшыра жанымның отын беріп,
Талайлармен таныстық,
Өкінбедік,
Ұмытпадым ешбірін,
Онда мені
Бәрі ұмытып кететін секілденіп.
Сәкен Иманасов