Саясат
Сара жолды салмақтар дөп:
«Құдай жоқ,
Пайғамбар жоқ,
Аруақ та жоқ,
Мәңгілік материя
Кеңістікті,
Кезеді
Жел айдаған қаңбақтай боп!
Әлемнің
Етек-жеңін жыйғызамыз,
Тентекті
Тәртіпке сап тыйғызамыз.
Тарыдай қауыздағы,
Дүниені,
Партия
Қаулысына сыйғызамыз!»
Жақсыны жер аударды,
Қудалады,
Белсенді
Шолтаңдаған уралады.
Сарабдал саналыны
Торға қамап,
Саясат
Семсерімен туралады…
Сыймады,
Қаулыға өмір,
Сия алмады,
Тамырын
Тіршіліктің қия алмады.
Туралып кетті өздері,
Торда қалды,
Құдайсып,
Ұмытқандар бір Алланы.
Б. Әлімжанов