Елім тыныш болса дейміз,
Жер тыныш,
Тұмшалаумен ашылмайды кең тыныс,
Еңсеңді езіп,
Өміріңді өксітер
Өн бойыңды буып алса
Қорқыныш!
Қоянға да жем болады
Қашқан ер,
Сасқан кезде
Жоқ қой деме басқа жол,
Қорқаулардың
Қиратып шық қоршауын,
Ең ақыры
Жастығыңды жастап өл!
Қорықпа өлімнен,
Тербетеді қара жер.
Сен кеткенмен
Қара ормандай қалады ел.
Бұл пәниге алғыс айт та,
Бақиға
Бата тілеп,
Батыл басып бара бер!
Б. Әлімжанов