Өзіңмен қалсам кезігіп
Ғажайып бір күй туатын,
Екеуміз ғана сезініп,
Екеуміз ғана ұғатын.
Айтуым керек болса да,
Сөз табу қиын мұндайда.
Айымау, мені қинамай
Айтқызбай білсең болмай ма?!
Алаулап нұрың жүзіңде,
Ботадай көзің мөлдіреп,
Жарқ ете қалған кезіңде
Кетеді жаным елжіреп.
Наздана күлсең сыңғырлай,
Жадырар жаным жаңарып,
Жаңбырдан соңғы қырлардай
Дүние кетер тазарып!
Баянғали Әлімжанов