Жайығым, не жыр бастадың?
Не дейді маған жас талың?
Сыбдыры еске сала ма
Он сегіз жастың дастанын?
Жастықтың жалын шақтарын
Жағаңнан іздеп таппадым.
Алғашқы махаббатымның
Құмыңа көмдім аптабын.
Не іздедім сенің жағаңнан,
Бұл күнде тегіс жаңарған?
Мөлдір көз ағын тәрізді
Жолықпай кеткен бала арман.
Жүректе бір із қалдырған,
Қол бұлғап кейде алдымнан,
Шағалам болып оралдың
Дауылға қанат талдырған.
Ақұштап Бақтыгереева