Көкқұтан – Үлкен аққұтаннан сәл кішілеу. Мойыны, жемсауы, құсағы ақ, тұмсығы қанжар құсап біткен, сары түсті, мойнының алдыңғы жағында тұмсығынан омырауына дейін созылатын қара жолағы, басында желкесіне қарай салбырап тұратын қара түсті айдары бар. Арқасы мен екі бүйірі күлгін сұр. Аяқтары сары.
Көкқұтан ұшып бара жатқанда мойнын S әрпі құсатып иіп алады да сирақтарын артқа қарай созып жібереді. Қанаттарын сирек қағып, қалықтап, әдемі ұшады. Қонып отырғанда биіктігі 1 метрге дейін барады. Салмағы 2 килодай. Осыншама ірі құс болса да, егер қапелімді қауіп төнсе бірден көтеріліп, ұшып кете алады. Теңіздің, өзен-көлдердің суы тайыз жағалауларында, батпақтардың жиегінде кездестіруге болады.