БАЙСЕРКЕ МЕН ТҰРЛЫБЕК
Он дуанды басқарған генерал-губернатордың бас кеңесшісі болған керей Тұрлыбек Көшенұлы (1765-1848) елдің бәрінен сыбағасын жеп үлгере алмайтын болғандықтан, барған жеріндегі кейбір жағымпаздар «сыбағаңыз» деп мал беруді әдетке айналдырған екен. Бірде Тұрлыбек осындай сый ретінде бір нарды сыйлыққа алып қайтып келе жатқанда Байсерке абыздың үйіне тоқтайды. Талай әңгіменің басын қайырған Тұрлыбек Байсеркеге керемет бір түйе әкеле жатқанын айтады. Шешен естімеген сыңай танытады. Тұрлыбек менің жібек жүнді нарымды көріңіз деп, қолқа салып қоймайды. Сонда:
Байлауы жоқ шешеннен,
Үндемей отырған есті артық.
Бәйге алмаған жүйріктен,
Белі берік бесті артық.
Мұнарланған күндізден,
Жұлдызы жарық түн артық.
Парадан алған түйеден,
Тәңірім берген ешкі артық, —
депті