ГРАВИТОН – гравитациялық өрістің кванты. Жалпы салыстырмалық тео- рия бойынша гравитациялық өрістің ұйытқулары вакуумда гравитациялық толқындар түрінде таралады. Электрмагниттік өрістің кванты – фотон ұғымына әкеп соқтыратын осы өрісті кванттауға ұқсас гравитациялық толқындар өрісін кванттау гравитациялық өрістің кванты – гравитон ұғымына әкеледі. Гравитонның энергиялары мен импульстерінің қосындысы гравитациялық толқындардың энергиясы мен импульсін анықтайды. Спині 1-ге тең фотоннан гравитонның айырмашылығы оның спині 2-ге тең (h бірліктерімен), бұл жайт гравитациялық өзараәсерлесудің тензорлық сипатын бейнелейді. Гравитонның тыныштықтағы массасының нөлге тең болуы қажет, ал жылдамдығы – бос- тықта жарық жылдамдығына тең. Бөлшектердің және антибөлшектердің аннигиляциясы және жұптардың тууы, мысалы, е+ + е- ↔ g + g кезінде гравитондардың (g) пайда болуы және жойылуы мүмкін. Бірақ мұның ықтималдығы туу үрдісі фотондардың туу ықтималдығынан 1030 – 1040 есе кем. Сондықтан апаттық ғарыштық құбылыстар кезінде жоғары энергиялы гравитондардың шығаруы аз болмақ. Гравитациялық өзараәсерлесу өте әлсіз болғандықтан гравитондарды анықтау мүмкіндігі әзірше ғылыми тәжірибелерден сырт қалуда.