АУЫРСЫНУ — түйсіктің ерекше түрі. Ауырсыну денеге ішкі мүшелерден немесе сырттан қолайсыз тітіркендіргіш әсер еткенде туындайтын жан құбылысының жағдайы. Кісі дені сау кезінде түйсіктердің осы түрін байқай бермейді. Орыс ғалымы И. М. Сеченев мұндай түйсіктерді “көмескі түйсік” деп атаған. Органикалық түйсіктердің құрамына енетін адам организмінің жалпы хал-күйінің негізі болып табылатын осынау түйсіктердің профилактик. маңызы зор. Ол жаңадан бөлініп келе жатқан аурудың алғашқы хабаршысы ретінде ағзаның бірқалыпты жұмысының бұзыла бастағанын білдіреді. Осындай жағдайда адамның көңіл-күйі кейде күрт нашарлап, дегбірсізденіп, ауруды болдырмау шараларын қарастырады. Ерік-жігері күшті, рухани өмірінің мазмұны бай, уақыты үнемі іс-әрекетке толы адам тәнге түскен осындай қолайсыз жағдайларға бой бермей, шыдамдылық көрсетеді. Ауырсыну түйсігін шеткі жүйке саласы, әсіресе, ми қабығы орталығы басқарып отырады.