Егер сізге қазіргі фильмдер ақымақ болып кеткендей көрінсе – сізге олай көрінген жоқ. Солай жоспарланған.
Мэтт Дэймон Джо Роганның подкастына Бен Аффлекпен бірге түскен жаңа фильмін жарнамалау үшін келген еді. Сөз арасында ол Netflix-тің ішкі асханасы туралы қызықты ақпаратты ашып қалды.
Белгілі болғандай, платформа сценаристерден сюжетті диалогтар арқылы үш-төрт рет қайталап айтуды талап етеді. Себебі: көрермендер фильммен қатар телефонға телміріп отырады және экранда не болып жатқанын түсінбей қалады. Сонымен қатар – соңында кульминациясы бар баяу дамитын оқиғаларға тыйым салынған. Барлық қызықты дүниені алғашқы бес минутқа сыйғызу керек. Әйтпесе, адам жай ғана өшіріп тастайды.
Киноның классикалық Show, don’t tell (Көрсет, бірақ айтпа) ережесін Netflix төңкеріп тастады. Ендігі ереже – рилс көріп алаңдап отырған адам оқиға желісін жоғалтып алмауы үшін бәрін айтып бер, түсіндір және қайтала. Және мұны кейіпкерлердің аузымен, анық көрініп тұрған нәрсені дауыстап айтқызу арқылы жасау керек:
— Шыны керек, Джеймс, бұл керемет пейзаждар мен романтикалық жаңбырға толы тамаша күн болды, бірақ бұл саған менің таңдауыма күмән келтіруге құқық бермейді. Ертең мен Полға тұрмысқа шығамын.
Шын мәнінде, бұл жаңалық тек кино туралы емес, жалпы бәріміз өмір сүріп жатқан «жаңа ғажайып әлем» туралы.
Мен бұған дейін адамзаттың ақымақтанып бара жатқаны туралы жазған болатынмын. Ақымақтану – мәселенің бергі жағы ғана. Сонымен қатар, зейіннің шоғырлануы (концентрация) бір рилстің ұзындығына дейін қысқарып кетті.
Біз үшін бұл қандай қорытынды береді? Қатал қорытынды: сіздің бизнесіңіздің аудиториясы да бәріне жартылай ғана көз қырымен қарайды. Мәтінді сөз аралатып оқиды. Және зейіні басқа жаққа ауғанша ғана тыңдайды. Ал зейін тез ауады.
Сондықтан кез келген бизнес-коммуникацияда (клиенттер, серіктестер немесе қызметкерлер болсын):
- Ең бастысын барынша ықшамдап және алғашқы минуттарда айту керек. Сөзді алыстан немесе контекстен бастамай, бірден мәні мен пайдасына көшіңіз.
- Негізгі ойды әртүрлі сөздермен бірнеше рет қайталаңыз. Бұл енді занудтық емес, қажеттілік.
- Аяусыз жеңілдетіңіз. Күрделілік — тек тар шеңберлі (нишевая) аудиторияға арналған сән-салтанат.
Мұңды ма? Мүмкін. Бірақ бизнес — прагматикалық дүние. Зейіннің деградациясына налып отыра беруге болады немесе оны бар нәрсе ретінде қабылдап, соған бейімделуге болады.
Ойын-сауық индустриясы мұны түсініп қойды. Ал сіз ше?