Білім беру салалары: Қатынас, таным Бөлімі: Қазақ тілі.
Тақырыбы: Таңертең не істейміз?
Мақсаты: сөздерді сөз тіркесімен айтуға, сөйлем құрауға жаттықтыру.
Білімділік міндеті: өз іс-әрекеттерін айта алуға үйрету. Қазақ тіліндегі сөздер мен сөйлемдерді түсініп және күнделікті өмірде қолдана білуге үйрету. Шағын мәтіндер құрауға жаттықтыру.
Дамытушылық міндеті: сөздегі қазақ тіліне тән дыбыстарды ойын жаттығуларында дұрыс айтуға дағдыландыру.
Тәрбиелік міндеті: ұқыптылыққа, тазалыққа тәрбиелеу.
Күтілетін нәтижелер:
Жасайды: жаңа сөздерді айтады, сөйлемдерді, шағын мәтіндер құрастырады.
Түсінеді: тәулік бөліктері туралы ұғымдарды.
Қолданады: сұрақтарға жауап береді.
Қолданылатын көрнекі құралдар: қуыршақтар – Сәуле мен Арман, үлестірмелі материалдар, суретті сөздіктер, жұмыс дәптері, айна, қарындаштар, фишкалар. Билингвалды компонент: таңертең тұрамын – утром встаю, бетімді жуамын – умываю лицо, тісімді тазалаймын – чищу зубы, жаттығу жасаймын – делаю зарядку, шашымды тараймын – расчесываюсь, киімімді киемін – надеваю одежду, балабақшаға барамын – иду в детский сад.
ҰОҚ барысы
1. Ұйымдастыру кезеңі
Шаттық шеңбері
Біз кішкентай баламыз, Бақшамызға барамыз. Күні бойы қызыққа
Батамыз да қаламыз.
Ғажайып сәт. Қонаққа қуыршақтар – Сәуле мен Арман келеді.
– Сәлеметсіздер ме?! Ойын ойнауға шақырады.
Өткен «Тазалықты сүйеміз» тақырыпты қайталау.
Қима материалмен жұмыс. Педагог заттарды атайды, балалар суреттерді көрсетеді. Балалар әр дұрыс жауап үшін фишкадан алады, соңында фишкалар саналып, жеңімпаз анықталады.
2. Негізгі кезең
Қуыршақ Сәуле балаларға тәулік бөліктерін атауды ұсынады.
Балалар жауап береді: таң, күн, кеш, түн.
Жаңа сөздермен таныстыру.
Арман мен Сәуле диалог жүргізеді.
– Сәуле, сен таңертең не істейсің?
– Мен таңертең тұрамын.
– Таң-ер-тең- ң тұ-ұ-ұ-ра-мын. Таңертең тұрамын (айнамен жұмыс).
– Бе-ті-і-ім-ді-і-і жуа-мын – бетімді жуамын.
– Ті-с-і-і-ім-ді-і-і та-за-лай-мын – тісімді тазалаймын.
– Ша-шым-ды та-рай-мын – шашымды тараймын.
– Жат-ты- ғу жа-сай-мын — жаттығу жасаймын.
– Ки-і-м-і-і-м-д-і-і-і ки-е-мі-і-і-н – киімімді киемін.
– Содан кейін анаммен балабақшаға барамың.
Балалар қуыршақтардың (педагогтің) соңынан сөздер мен сөйлемдерді қайталайды.
Сөздік ойын: «Жалғасын тап». Үлестірмелі материалдардың көмегімен сөйлемді толықтырады.
Таңертең … (тұрамын).
Бетімді … (жуамын).
Тісімді … (тазалаймын).
Жаттығу … (жасаймын). Шашымды … (тараймын).
Киімімді … (киемін).
Балабақшаға … (барамын).
Сергіту сәті.
Таңертең тұрамын,
Қолымды жуамын, Бетімді жуамын.
Тісімді тазалап, Шашымды тараймын.
Айнаға қараймын.
Дидактикалық ойын: «Мен бес сөз білемін». Берілген тақырып бойынша 5 сөз құрайды.
Жұмыс дәптерімен жұмыс.
1.Суретке қара. Сұраққа жауап бер. Арман таңертең не істеді?
Педагог жеке жұмыс жүргізеді. Балалар сөйлем құрайды.
– Арман төсегін жинады.
– Арман жаттығу жасады.
– Арман тісін тазалады.
– Арман анасымен балабақшаға барады.
Ойын: «Мен не істегенімді айтпаймын, көрсетемін». Педагог жаттығу жасау, тамақ ішу, ән айту, билеу, сурет салу, ұйықтау дегендерді қимылмен көрсетеді, балалар не істегенін айтады.
3. Рефлексия
Педагог қорытынды жасайды. Бағалау, мадақтау.
– Сендерге не ұнады? Жұмыс дәптеріне өздеріңнің игерген білімдеріңнің дәрежесін, үлгерімдеріңді смайл арқылы белгілейсіңдер. Қуыршақтар балалармен қоштасады.