БЕКТҰР БАТЫРҚОЖАҰЛЫ
(1866-1932)
Бектұр ақын 1866 жылы қазіргі Ақмола облысының Қорғалжың ауданында дүниеге келген. Әкесі Батырқожа кезіндегі арғын қуандықтағы темеш руынан. Сыпанға ол көп еңбек сіңірген деседі. Батырқожа өз еңбегіне тиесілі ақы ала алмай, күн көрісі нашарлағаннан кейін, 1897 жылдардың шамасында қоныс өзгертіп, Омбы жағындағы бір күйлі туысына көшіп барып паналайды. Күйлі туысқанының аты Бектас деседі. Осы кезде Бектұр ақын болып қалыптасқан шағы екен. Бектұр есейгенде әкесі қайтыс болады. Жоқтықтың зардабын көп тартады. Содан шешесі екеуі сол маңдағы Әйтен деген байдың малын бағып, шөбін шауып, тіршілік жасайды. Бектұр он беске келмей, сөз тапқыштығымен, суырып салма талантымен таныла бастайды. Қазіргі Омбы, Павлодар, Ақмола өңірлерінде Бектұр ақын айтты деген өлеңдер, шешендік сөздер көп тараған.
Ақын 1932 жылы 66 жасында Қазіргі Омбы облысындағы Балапанның Күнгейі деген жерде қайтыс болады.
Бектұрдан Сүлеймен (1898-1963), Әлі (1901-1982) деген екі ұл туған. Мұның екеуінен де өсіп-өнген ұрпақ бар. Сүлейменен Мәкен, Бикен атты ағайынды екеу туған. Мәкен Бектұров Сүлейменұлы бұрын Жезқазған педагогикалық институтының ректоры болған, профессор.