Күндей шалқып күлгенің –
Шаттығыңның нұры ғой.
Шат боп өмір сүргенің
Заманыңның сыры ғой.
Сенің нұрлы жүзіңнен
Көрем бақытты өмірді.
Сенің әрбір сөзіңнен
Күй естілер көңілді.
Сол себепті мен саған
Ғашықтайын құмартам.
Жүрегімнен, жанымнан
Жыр жазамын, сыр айтам.
Күндей шалқып күле бер,
Ақ маңдайлы алма жүз.
Саған сірә тең келер
Жер жаһанда бар ма қыз?
ҚАСЫМ АМАНЖОЛОВ