Қызыл тастан үй салдырып,
Он жыл тұтас отырып,
Әңгіме құрып кеткен жер.
Қарақұтаң Қалдыбай,
Жалғызағаш, Жақсыбай,
Көлектің ұлы Қарт Қожақ,
Естерекұлы Тарғынның
Тарыққанда ақыл сұрай барған жер.
Қалдығайты, Бұлдырты,
Жер реңкін қарасаң,
Көдесінің түбі сайын бір жылқы,
Қарақыпшақ Қобыланды
Тұлпар мініп келген жер.
Аузы түкті кәуірді,
Басы шоқты қалмақты,
Ерлерім айдап келген жер,
Қысырақтай бөлген жер!
Өлеңтінің аяғы,
Шідертінің қоспасы,
Аңқатының басы – Тасоба,
Он сегіз жыл атысып,
Орманбет бидің өлген жер,
Он сан ноғай бүлген жер.
Орта бойын сырлаған,
Оқ жаңбырдай жауған жер.
Мұрат Мөңкеұлы