Ақ сазан үркіп кеткен Жайықтаймын,
Ойлардан Жайық жайлы айықпаймын.
Даданың жанарынан мұң байқасам,
Айдында ескегі жоқ қайықтаймын.
Не болмақ нәр татпаса шынар-шыбық,
Қураса тамыры, гүл сынар шіріп,
Табиғат қарғысына ұшыраған
Жағада – үш жыл бойы қуаңшылық.
Сан алуан адамдардың кеселі де,
Қазақтың
Әр кез соры бес елі ме?
Жетсе
Егер құдіретім,
Туған жердің
Айналып кетер едім нөсеріне.
Ақұштап Бақтыгереева