Ұрқия шашың жібек, қанжар қасың,
Көрінер тамағыңнан ішкен асың.
Жаманға сені қор ғып қия алмаспын
Тірлікте аман болса ғазиз басым.
Күмістей он саусағың тартқан сымға,
Құрайын тұзағымды тартып жымға.
Құрысын Ақан атым жете алмасам,
Қор қылсам қапияда сені сұмға.
Айырар асылзада жігіт парқын,
Жүрекке жара салдың қалқам алтын.
Махаббат екеумізде қайнаған су,
Ішімді жандырады, сыртым салқын.
Ақан Сері