Кеңес Одағының батыры, академик
Мəлік Ғабдуллинге арнаймын
«Бірғыздың» қалың қамысы
Уілдеп әнге салады.
Қарауытып салқын тау іші
Желтаудың баурын шолады.
Сықырлап табан темірі,
Желеді борт-борт шаналы.
Жолаушы қарттың серігі
Балғын жас – ойлы жанары.
Ақыл мен өрті тұтасқан
Қой көздер ондай сирек-ау.
Шолпаны жанған сүт аспан
Жол болсын деуді білмеді-ау!
Қараңғы таңда жосылған
Көрмеді-ау ешкім шана ізін.
Ұға алмай қалды-ау тосыннан
Жұлдызы сөнбес таң азын.
Әшейін жай бір күн деппіз
Сағызын созған баяғы.
Басталған таңды білмеппіз
Батырдың өмірбаяны.
Қорғанбек Аманжолов