АРЫСТАН (Panthera leo) — мысық тұқымдасына жататын ең ірі жыртқыш жануар. Орт. Африка мен Оңт. Азияның саванна, шөлейт аймақтарын-да, шөлді жерлерінде кездеседі. А-ның дене тұрқы 2 м- ден астам, салм. 250 кг-ға жетеді. Жүні қысқа, бурыл сары. Құйрығының ұз. 1 м-ге дейін, оның ұшы қара түсті шашақ болып келеді. Арланының мойны мен кеуде жағында қара қоңыр, кейде ұзын қара жалы болады. Ұрғашысы мен жас А-ның жалы болмайды. А. жеке-жеке де, 5 — 10-нан топтанып та жүреді. А. ірі сүтқоректілермен (бөкен, зебр, мүйізтұмсық, т.б.), сондай-ақ құстармен де қоректенеді, кейде жануарлардың өлімтігін, тышқандарды да жейді. Қорегін, негізінен, түнде аулайды. 3 жаста жыныстық жағынан жетіледі. 2 жылда бір, 1 — 6 (әдетте 3 — 4) күшік табады. 30 — 35 жыл өмір сүреді. А. саны өте азайып кеткендіктен аулауға тыйым салынған. Үндістанда кездесетін түрі — Р.l. persica — Халықар. табиғат қорғау одағының “Қызыл кітабына” енгізілген.