АМФОЛИТТЕР — электролит ерітінділерімен әрекеттескенде аниондарын да, катиондарын да алмастыру қабілеті бар торлы полимерлер немесе биполярлы ионалмастырғыш шайырлар. Олардың құрамындағы қышқылдық және негіздік топтар өзара әрекеттесіп тұз түзуі мүмкін. Ең көп тарағандары — амино немесе иминокарбоксильдік, пиридинкарбондық, аминофосфорлы-қышқылдық А. болып табылады. Олар ионогенді топтары қарама-қарсы зарядталған мономерлерді полимерлеу немесе поликонденсаттау арқылы алынады. А. — қатты түйірлі өнімдер, өлшемдері 0,2 — 2,0 мм. Кейбір А-ді сумен жуу арқылы бастапқы қалпына келтіруге (регенераттауға) болады. Жалпы, А. гидрометаллургияда ауыр, түсті және сирек металдарды, күшті және әлсіз электролиттерді, биол. препараттардың ерітінділерінен анорганик. қоспаларды бөліп алу үшін қолданылады.