АЛМАТЫ ИНДУСТРИАЛДЫҚ КОЛЛЕДЖІ — мемлекеттік арнаулы орта оқу орны. 1948 ж. Семей қ-нда индустр. техникум болып ашылған. 1954 ж. Алматыға көшіп келді. 1996 жылдан қазіргі атымен аталады. Негізі қаланғалы 14 мың маман бітіріп шықты. Колледжде сабақ казақ және орыс тілдерінде жүреді. Күндізгі бөлімінде: машина жасау өндірістерінің жабдықтарын жөндеу және тех. қызмет көрсету, ағаш өндеу технол-сы, жиһаз бұйымдарын көркемдеп өңдеу және оның технол-сы, ағаш өндеу өнеркәсібіндегі экон., есеп-қисап және бақылау, автокөлік қатынасын басқару және жүк тасымалдауды ұйымдастыру, машина жасау өндірісінің автоматтандырылған жүйелерін басқару мамандықтары бойынша 412 оқушы білім алады. Сырттай оқу бөлімі бар. Жоғары білікті 49 мұғалім дәріс береді. Оның біреуі ғылым докторы, екеуі ғылым кандидаты. 45 мың дана қоры бар кітапхана, 16 орындық асхана, 80 орындық жатақхана, ағаш шеберханасы жұмыс істейді. Жаңа оқу кабинеттері мен компьютерлік сыныптар іске қосылды.